- [ ] ايوة
ازيك يا ريس .. كدة تهرب مني اخر مرة
- [ ] لا فعلا كان لازم امشي. اوعى تكون عايز نتقابل تاني ؟
يا ريت .. بس انا مش قادر استنى لحد ما اشوفك
- [ ] خير .. عايز تاخد مني حديث تليفوني؟
بصراحة قلقان وعايز اتكلم مع اي حد. البلد حالها يقلق
- [ ] الصراحة .. اه . الوضع بقى مقلق والمستقبل ما لوش ملامح
طب في رايك ، هل الانتخابات الجاية ح يبقى لها تاثير؟
- [ ] مش عارف ارد ، بس انا كل اللي انا شايفه ان البلد مش محتاجة اضطرابات داخلية دلوقت خالص، وكفاية علينا الاضطرابات الخارجية
تقصد انه يبقى الحال على ما هو عليه؟
- [ ] بالظبط كدة
رغم كل اللي في البلد من غلاء وديون واصول بتتباع و سياسات اقتصادية متناقضة ؟
- [ ] بص بقى … لما تكون في مشكلة، وقدامك كذا طريق لمحاولة حلها ، لازم تفكر هل الطريق ده ح يحل؟ واللا انت نفسك تعمل اي حاجة مختلفة والسلام؟
مش فاهم!
- [ ] يعني بصراحة ووضوح .. هل لو انتخبت رئيس تاني غير الحالي ، ح يقدر يحل المشاكل اللي قلت عليها؟ واللا انت قرفان من الحالي فعاوز تغيره وخلاص؟
طب هو الحالي عمل ايه؟ احنا عمرنا ما وصلنا للحضيض زي دلوقت.. ده الدولار وصل ٤٢ جنيه يا عم .. اتنين اربعيييين.. ولسة
- [ ] كلام جميل .. بس هل الجديد ح يرجع الدولار لـ٦ جنيه؟ او حتى ١٦؟
ممكن يوقف بعض المشاريع المكلفة اللي عاملة زي بلاعة فلوس
- [ ] تبقى مصيبة… لانك صرفت ووقفت.. كنت كملت .. ساعتها ح تجيبلك ايراد او ح توفر لك فلوس. الكلام ده لو مشروع لسة ما بدأش ممكن توقفه. اديك شفت توشكا ، لو كان مبارك كملها ما كناش غرمنا قد كدة دلوقت
بص .. انا لما احب اقيم النظام يبقى اشوف البلد كانت ايه وبقت ايه، بعد مرور ١٠ سنين من الحكم
- [ ] ممكن دي تكون طريقة تقييم صح، بس في الظروف العادية ، مش الاستثنائية
يا عم ارحمني بقى .. هو الظروف الاستثنائية دي عندنا احنا بس؟ ما كل الدول بتمر بظروف استثنائية
- [ ] بس مش زي مصر
اشمعنى ؟ اوع تقول لي نظرية المؤامرة اياها؟
- [ ] مش ح ادخل في مناظرة معاك .. انا بس ح اقول لك انظر حولك ، واسمعني وما تقاطعنيش لحد ما اخلص
اتفضل الميكروفون سيادتك 😁
- [ ] من غير تريقة وحياة ابوك ..
ماشي
- [ ] عايزك تنظر حولك في كل الاتجاهات.. شرق جنوب غرب شمال
هممممم
- [ ] شرق: سيناء ح تتعرض لغزو فلسطيني مش ح تقدر تقول له لا، الا اذا ضربت الفلسطينيين بالنار ، زي ما إسرائيل بتعمل
- [ ] جنوب (لسة الشرق ح ارجع له تاني)، السودان بيتقسم للمرة التانية ولسة التالتة، عدوك حميدتي هناك مدعوم من روسيا والامارات وجاري تسليحه عشان يتفوق وتهديدات لمصر من امريكا وروسيا واوروبا بعدم التدخل في السودان. بس كدة؟ لا مش بس كدة، عندك اثيوبيا وسد النهضة ..انا عارف انت ح تقول ايه : ليه ما ضربناش السد؟ بصراحة انا كان رايي نضربه وان شاللا نموت بعد كدة احسن ما نعطش ونتذل. بس هل القرار ده سهل تاخده وتدخل في حرب مع اثيوبيا وامريكا واسرائيل وروسيا والصين والامارات والسعودية؟ أنا بصراحة مش عارف ايه حجم التهديدات اللي تلقاها السيسي لو ضرب السد، عشان اعرف اجاوب على السؤال ده
- [ ] عندك الغرب ، ليبيا .. حفتر قلب عليك دلوقت وبيدعم حميدتي وبيلعب في تشاد لهذا الغرض ويمكن كمان دارفور
- [ ] الشمال : بتلعب على الصراط .. مصالح مع عداوات متضاربة في نفس الوقت ... شوية مع اسرائيل على حقول الغاز، وشوية مع تركيا ، ومش عايز تزعل اوروبا، وعندك استثمارات نفسك تشتغل في المناطق اللوجستية الجديدة ومش عايز تزعل حد
انت قلت لسة ح ترجع للشرق
- [ ] ايوة لان حلفاءك الأيديولوچيين ، اللي هم العرب ، مش بس بطلوا دعم، لا ده كمان بيدمروك .. بيستثمروا في اثيوبيا وبيشتروا اصولك بشروط مجحفة وكمان بيتعاملوا مع اعداءك بطريقة تؤدي الى اضعافك .. زي الممر الجديد بديل قناة السويس اللي بيفكروا فيه، وما تنساش ان بعد نزوح الفلسطينيين الى سيناء ، كل المشاريع اللوچستية على قناة السويس و ميناء العريش والذي منه ممكن تتأثر
يا نهار اسود
- [ ] زي ما يكون العالم كله ضدك. انا ما جبتش سيرة مؤامرة اهو. هي الظروف والصدف كلها تأمرت ضدنا من غير مؤامرات ولا حاجة .. حتى الكورونا وحرب اوكرانيا جم في وقت مفيش اوحش من كدة. دلوقتي بقى عاوزك تحط نفسك مكان رئيس جمهورية مصر العربية وقول لي ح تتصرف ازاي؟
اول حاجة ح اعملها اني استقيل 😀
- [ ] تمام .. انا فعلا مش فاهم مين له شوق يحكم مصر دلوقتي. انا مش عارف المرشح الرئاسي طنطاوي ده ح يحط برنامج ايه يقنع الناس انها تنتخبه؟ مفيش غير انه معتمد على الرغبة في التغيير وزهق الشعب ...
طب ايه مميزات الحالي ؟ يعني ليه السيسي ممكن يكون افضل؟
- [ ] بص .. اللي ماسك البلد عشان ما تتفككش لحد دلوقت هو الجيش. انت رسميا مش في حالة حرب، بس الحقيقة انت في حرب .. حرب اقتصادية من صندوق النقد والدول العربية اللي مسكت ايدها … حرب تكنولوجية مخلياك رغم تسليحك القوي مش عارف تضرب السد عشان روسيا وامريكا والصين بتحميه باسلحة دفاعية اكثر تطورا .. حرب مائية .. حصار من كل ناحية .. لما حالة الحرب تنتهي نبقى ندور على رئيس مدني. لكن طنطاوي او غيره عمره ما ح يكون له سلطة على الجيش في الوقت الحالي .. الكلام ده لما يكون رئيس مدني بقاله ١٠ سنين في الحكم والدنيا مستقرة ، ممكن يبقى هو القائد الاعلى للقوات المسلحة ، لكن يطلع من وسط حقول الدرة ويأمر الجيش؟ عمر الجيش ما ح يطيع. ولنا في محمد مرسي عبرة ومثل رغم انه كان مدعوم بفصيل سياسي له وزن وقتها.
هو انت ظابط وانا مش واخد بالي؟😀
- [ ] انا كنت طول عمري باقول البلد مش ح تتقدم تحت حكم العسكر، وما زلت باقول كدة ومقتنع بيه
طب ليه مش عايز تغيير؟
- [ ] عشان انا مش عايز اتقدم … انا عايز اعيش ، ولازم اكسب الحرب دي
تفتكر ممكن نكسبها؟
- [ ] هو احنا ح نكسبها ، بس السؤال امتى؟ لو عندك عقيدة ح تعرف ان بني إسرائيل مصيرهم محدد مسبقا:" ليسوؤوا وجوهكم وليدخلوا المسجد كما دخلوه اول مرة"، بس ده لازم يسبقه "علوا كبيرا"
أعلى من كدة؟؟؟!!!😱
- [ ] أظن كدة .. علوا كبيرا بمقاييس ربنا يعني - على قد فهمي حلمي نظمي رسمي- معناها ماحدش قدهم .. هم حاليا متهيالي لسة مش باين .. لما يبقوا الحاكم بأمره في العالم هو ده العلو الكبير .. عموما ده تصوري الخاص واتمنى اكون غلطان ويكونوا وصلوا اعلى حاجة …. عشان ينزلوا بقى
أنا خايف على مصر ...؟
أنا كمان خايف ، بس مصر ان شاء الله محروسة .. السيدة زينب رضي الله عنها دعت لنا.. قالت يا أهل مصر، آويتمونا آواكم الله ، نصرتمونا نصركم الله ، وجعل لكم من كل هم فرجا ومن كل ضيق مخرجا .. يعنى الهم موجود بس الفرج جاي وراه ، والضيق ح يحصل ،لكن المخرج ح يتوجد .. بس عايزين شوية صبر وإيمان ونتقي الله في بعض ... بلاش نعض في بعض احتياطي ، وساعتها ح يحصل الفرج ونخرج من اللي احنا فيه
تفتكر ممكن نشوف اليوم ده؟
- [ ] اكيد ح نشوفه .. سواء رأي العين في الدنيا او من مقاعد المتفرجين في الاخرة ، ووقتها.....؟
// تيت تيت تيت
هشام سعيد